P80 milyong puslit na sigarilyo at face mask, nasabat
MANILA, Philippines — Nasabat ng Bureau of Customs (BOC) ang nasa P80 milyong halaga ng mga puslit na sigarilyo at face mask nang salakayin ang isang bodega sa Bulacan, kamakalawa ng gabi.
Sinalakay ng mga tauhan ng Enforcement and Security Services Quick Reaction Team (ESS-QRT) at Customs Intelligence and Investigation Service (CIIS) ang bodega sa may Barangay Sta. Rosa, Marilao sa naturang probinsya sa bisa ng Letter of Authority (LOA) na inilabas ni BOC Commissioner Rey Leonardo Guerrero.
Dito nadiskubre ang nasa 1,000 master cases ng iba’t ibang sigarilyo kabilang ang brand na Marlboro at nasa 648 kahon ng N95 face masks na kinopya ang logo at disenyo sa mga sikat na fashion brands.
Ayon sa BOC, parte pa rin ang operasyon sa pagprotekta sa mga konsyumer na Pilipino sa panganib dulot ng mga pekeng produkto para sa kalusugan ngayong panahon ng pandemya at paghahabol sa mga hindi nagbabayad ng tamang buwis sa mga produktong ipinapasok sa bansa.
- Latest
