Operasyon ng Lotto draw napurnada

MANILA, Philippines — Napurnada ang pagbabalik-operasyon ng Lotto ngayong araw matapos na isinailalim ni Pangulong Rodrigo Duterte sa modified enhanced community quarantine (MECQ) ang Metro Manila at 4 na lalawigan.

Batay sa inilabas na opisyal na pahayag ng Philippine Charity Sweepstakes Office (PCSO), sinabi nito na bukod sa pagpapaliban ng pagbabalik ng limi­tadong operasyon ng lotto ay suspendido rin muna ang operasyon ng instant sweepstakes at online Keno sa mga nasabing lugar mula ngayong Agosto 4 ng hatinggabi hanggang sa Agosto 18.

Una rito, humingi ng ‘time-out’ ng dalawang linggo ang mga healthcare worker dahil sa lumolobo ng kaso ng coronavirus disease 2019 (COVID-19) sa ating bansa.

Matatandaan na inanunsiyo ni PCSO General Manager Royina Garma ang pagbabalik-operasyon na sana ngayong Agosto 4 ng limitadong operasyon ng lotto, kabilang ang Lotto 6/42 at MegaLotto 6/45 games, sa mga lugar na nasa ilalim na ng gene­ral community quarantine (GCQ) at modified GCQ (MGCQ).

Nagbalik na rin naman ang operasyon ng instant sweepstakes noong Hulyo 20 at maging ng online Keno na sinimulan noong Hulyo 28.