Quezon City Mayor Joy Belmonte, nagpositibo sa COVID-19
MANILA, Philippines — Inihayag kahapon ni Quezon City Mayor Joy Belmonte na siya ay nagpositibo sa COVID-19 kaya’t agad pansamantalang ipinasara ang kanyang tanggapan at ang common areas sa QC Hall para sa disinfection.
“Nais ko pong ipahayag sa lahat ng aking minamahal na QCitizens na ako po ay nagpositibo sa aking huling COVID-19 test.Nagpapasalamat po ako na agad itong natuklasan.Sa ngayon, maayos po ang aking kalagayan at wala po akong nararamdamang anumang sintomas. Mahigpit ko pong sinusundan lahat ng quarantine protocols ng ating Department of Health at sinimulan na rin po ng QC Epidemiology and Surveillance Unit (QC-ESU) ang contact tracing procedures,”pahayag ni Belmonte.
Hinala ni Mayor Belmonte na nakuha ang sakit mula sa mga ginagawang pagdalaw sa mga health center at ospital, special concern lockdown areas at mga komunidad para matiyak at malaman ang pangangailangan ng mga constituents.
“Sa simula pa lang, batid na naming posibleng mangyari ito. Pero hindi ko po ito pinagsisisihan. Inihanda ko na po ang aking sarili at buong puso ko po itong tinatanggap. Nangyari po ito sa kabila ng aking ibayong pag-iingat, pagsusuot ng face mask, madalas na paghugas ng kamay, at social distancing. Kaya sana ay magsilbi itong paalala na ang COVID-19 ay tunay na isang kakaibang sakit na dapat pag-ingatan pa nang lubusan,” sabi pa ni Belmonte.
Bagama’t naka-quarantine, tiniyak naman ni Belmonte na patuloy ang serbisyo at mga gawain ng lokal na pamahalaan.
“Maraming salamat po, at asahan ninyong sa aking paggaling, muli po ninyo akong makakasama upang personal po akong makapaglingkod sa inyo,” dagdag ni Belmonte.
- Latest