Sundalo, 3 pa utas sa baragay police action team
MANILA, Philippines — Apat katao ang patay kabilang ang isang sundalo habang apat pa ang sugatan matapos silang pagbabarilin ng mga armadong miyembro umano ng Barangay Police Action Team (BPAT) sa Brgy. Bohe Lebbung, Tipo-Tipo, Basilan nitong Biyernes ng gabi.
Kinilala ang mga nasawi na sina Private First Class Mark Anthony Monte, nakadestino sa Bohe Lebbung Detachment, mga CAFGUs na sina Samy Akay at Alibasa Antaas, at sibilyang si Kong Uging habang ginagamot sa ospital ang mga sugatan.
Ayon kay AFP-Western Mindanao Command Spokesman Major Arvin John Encinas, naitala ang pamamaril dakong alas-9:30 ng gabi sa naturang lugar kung saan itinuro ng mga testigo ang BPAT na nagsisilbing force multiplier ng Basilan Police ang nasa likod ng pamamaril sa mga biktima.
“Yan po ang lumalabas BPAT ang mga suspect but it is still subject for investigation,” ani Encinas.
Nabatid na kasalukuyang nasa lugar na kilalang balwarte ng Abu Sayyaf Group (ASG) at Moro Islamic Liberation Front (MILF) ang nasabing sundalo at mga CAFGU nang bigla silang paulanan ng bala ng mga armadong suspect. May matagal na umanong hidwaan na isa sa pangunahing motibong sinisilip ng mga awtoridad sa krimen.
- Latest