3-anyos pisak sa SUV

MANILA, Philippines — Napisak ang isang 3-taong gulang na babae makaraang mabangga at masagasaan ng isang Bicol bound na SUV sa Quirino Highway sakop ng Brgy. Rizal, Tagkawayan, Quezon kamakalawa.

Dead-on-arrival sa ospital ang paslit na si Yolanda Lazona, residente ng nabangit na barangay samantalang naaresto ng pulisya sa Sipocot, Camarines Sur ang driver na nakasagasa na si Jerickson Jay Mendoza, 31, ng Tondo, Manila.

Ayon sa ulat, dakong alas-5:30 ng hapon nang biglang tumawid sa highway ang bata at tiyempo namang parating ang Rav-4 ng suspek at hindi na  nakapagpreno hanggang sa abutan ang bata at masagasaan.

Dala ng takot na kuyugin ng taumbayan, mabilis na pinasibad ng suspek ang minamanehong SUV patungo sa Bicol subalit dahil sa koordinasyon ng Tagkawayan Police sa Sipocot Police ay naaresto ang una makalipas ang halos kalahating oras.