Bagong ‘Anti-Terror Bill’ aprub na sa House
MANILA, Philippines — Aprubado na kagabi sa ikatlo at pinal na pagbasa ng Mababang Kapulungan ng Kongreso ang kontrobersyal na bagong “Anti-Terrorism Bill”.
Sa botong 173 pabor, 31 no vote at 29 abstain, pinagtibay sa Kamara ang House Bill 6875 o ang New Anti-Terror Bill Act na amyenda sa Human Security Act of 2007 upang palakasin pa ang ngipin ng batas kontra terorismo.
Una nang sinertipikahan ni Pangulong Rodrigo Duterte ang Anti-Terror Bill bilang urgent upang maprotektahan ang pambansang seguridad at kapakanan ng publiko kaya minadali ng mga mambabatas ang pagpapasa nito.
Ang Anti-Terror Bill ay inaprubahan sa ikatlong pagbasa, isang araw lamang matapos itong makalusot sa ikalawang pagbasa.
Nag-convene ang House Committees on Public Order and Safety sa pamumuno ni 1st District Iloilo Rep. Raul Tupas at Defense and Security sa pamumuno naman ni Masbate Rep Narciso Bravo para i-adopt ang bersyon ng Senado.
Sa kanyang negatibong boto sa HB 6875 o New Anti-Terror Act , ipinaliwanag ni 1st District Albay Rep. Edcel Lagman na maraming butas ang nasabing panukalang batas na maaaring gamitin sa oposisyon na kalaban ng administrasyon.
- Latest