MRT-3, magsasakay lang ng 153 pasahero kada biyahe
MANILA, Philippines — Nasa 153 pasahero lang kada biyahe ang isasakay ng Metro Rail Transit Line 3 (MRT-3) kung sakaling mailagay nang tuluyan ang Metro Manila sa general community quarantine (GCQ) sa susunod na linggo.
“Kung kami po ay bibigyan ng order at nag-GCQ na tayo by June 1, ready naman po ang MRT-3 mag-mobilize,” ayon kay MRT director for operations Michael Capati.
Subalit,magiging malaki ang pagbabago ng operasyon ng MRT-3 kumpara sa dating nakaugalian ng mga pasahero bago maganap ang krisis sa coronavirus disease 2019 (COVID-19) na kung dati ay nasa 1,200 pasahero ang puwedeng isakay ng bawat tren ay gagawin na lang 153 katao na lang ang sakay nito kada biyahe kapag natuloy na ang operasyon.
Layunin aniya nitong matiyak na maipapatupad ang physical distancing o 1-meter gap sa pagitan ng mga pasahero at maiwasan ang paghahawahan ng virus.
Lilimitahan na rin lamang ang mga pasaherong papapasukin sa train platforms.
Lahat ng pasahero ay kinakailangan ding magsuot ng face masks at hindi pasasakayin kung mataas ang temperatura ng mga ito.
Hindi rin muna umano papayagan ng MRT-3 na sumakay ng mga tren ang mga taong pinaka-vulnerable sa sakit, gaya ng mga batang nasa 21 taong gulang pababa, o 60 taong gulang pataas.
- Latest
