ABS-CBN lumabag sa batas - Solon
MANILA, Philippines — “Ibasura ang apela ng ABS-CBN na isyuhan pa ito ng panibagong 25 taong prangkisa matapos naman ang mga paglabag sa batas ng higanteng radio-television network sa bansa”.
Ito ang naging panawagan ni House Deputy Speaker Rodante Marcoleta sa kanyang mga kasamahang mambabatas sa Kamara sa katatapos na magkasanib na pagdinig ng House Committees on Legislative Franchises at Good Governance and Public Accountability.
Iginisa ni Marcoleta ang mga kinatawan ng ABS-CBN na sinabing tapos na ang 50 taong prangkisa ng network kaya hindi na dapat pang i-renew ang prangkisa nito.
Ginamit din nito ang viral video ni Vice Ganda nang hamunin si Pastor Apollo Quiboloy na ‘stop’ o pahintuin ang “Ang Probinsyano” na pinagbibidahan ni Coco Martin at maging ang viral video naman ni Kim Chiu na ‘Bawal Lumabas “ ay sinabi ni Marcoleta na ngayon ay puwede nang lumabas sa ABS-CBN dahilan sarado na ang network.
Si Marcoleta ay isa sa mga mambabatas na humaharang na mai-renew ng karagdagan pang 25 taon ang ABS-CBN.
Nitong Martes sa halos kalahating oras na opening statement ni Marcoleta ay inisa-isa ng solon ang mga paglabag ng ABS-CBN kabilang ang 50 taong limitasyon sa legislative franchise para makapagpatuloy ng operasyon, pagbabawal sa foreign ownership, unfair labor practices, tax evasion at pagkiling umano sa pulitika sa 2016 at 2010 national elections.
Inihayag nito na ang pagbibigay ng legislative franchise ay hindi karapatan ng anumang network manapa’y isa lamang itong prebilihiyo.
- Latest