‘Di magsusuot ng face mask, aarestuhin
MANILA, Philippines — Dahil magiging mandatory na ang pagsusuot ng face mask, sinabi kahapon ng Philippine National Police (PNP) na maaaring maaresto ang mga lalabag.
Ayon kay P/Lieutenant General Guillermo Eleazar ng Joint Task Force COVID-19 Shield, hindi lang surgical mask kundi anumang uri ng proteksyon ay maaaring magamit ng mga residente na lalabas ng bahay.
Tugon ito ng PNP sa mga nagtatanong kung saan sila kukuha ng face mask ngayong kapos ang suplay dahil ang sinumang walang suot na face mask ay maaaring hindi payagang makalagpas sa checkpoint, pauuwiin o maaari ring maaresto. Ang local government units ang magpapasa ng ordinansa sa kani-kanilang mga lugar sa pagsusuot ng face mask. Kailangan ding ilatag sa ordinansa ang mga parusa sa mga lalabag.
Magugunita na kamakalawa ay inihayag ni Cabinet Secretary Karlo Alexi Nograles, spokesman ng Inter-Agency Task Force on Infectious Disease na ipinatupad ng gobyerno ang mandatory na pagsusuot ng face mask kapag lalabas ng bahay ang mga residente na nasa ilalim ng enhanced community quarantine (ECQ) dahil sa coronavirus disease 2019 (COVID-19) para maprotektahan ang sarili at iba laban sa COVID-19.
Hinihikayat ng IATF ang mga concerned local government units (LGUs) na magpalabas ng executive order (EO) o ordinansa na nag-aatas na kinakailangan ang magsuot ng face mask.
- Latest
