Cong. Yap, 48 oras na ‘di nakatulog sa maling resulta ng DOH–RITM
MANILA, Philippines — Dahil sa matinding epekto ng maling resulta ng Department of Health-Research for Intertropical Medicine (DOH- RITM) na positibo siya sa coronavirus disease 2019 (COVID 19), dalawang araw o 48-oras na hindi nakatulog si ACT-CIS Partylist Rep. Eric Go Yap.
“Inaamin ko, the past 48 hours has been very hard for me and to everyone around me. Hindi naging madali ito pero buong puso kong tinatanggap ang apology ng DOH-RITM,” pahayag ni Yap.
Ang pag-amin ni Yap sa pinagdaanan niya ay kasunod sa pag-anunsyo ng DOH-RITM na mali ang resulta na positibo siya sa COVID-19.
Agad namang tinanggap ni Yap ang “public apology” ng RITM matapos na bawiin ang maling naipalabas na resulta.
Nilinaw ng RITM na hindi positibo si Yap sa COVID-19 kundi negatibo sa nasabing sakit.
Aminado ang kongresista bagama’t labis siyang nabahala at maging kanyang pamilya sa maling resulta ay bandang huli ay masaya siya dahil klaro siya sa naturang sakit.
Nitong Biyernes ng gabi, humingi ng “public apology” ang DOH-RITM kay Yap at sinabing nagkaroon ng “clerical error” sa resulta ng COVID test na naipadala nila sa kanya.
- Latest
