1 pang solon positibo rin sa virus

MANILA, Philippines — Kinumpirma ng Mababang Kapulungan ng Kongreso na positibo sa coronavirus disease o COVID-19 si Bulacan Rep. Henry Villarica matapos na magkaroon ng exposure sa isang tao na tinamaan ng nasabing virus.

Ayon kay House Secretary General Atty. Jose Luis Montales, lumalabas na kumpirmadong positibo si Villarica sa coronavirus nang lumabas ang COVID-19 test result nito kahapon.

Huling pumasok ng Kamara si Villarica noong Marso 4 at noong Marso 8 ay dumalo pa siya sa isang event ni Baliuag Mayor Ferdie Estrella na nauna nang naireport na positibo sa COVID-19.

Isinugod ang mambabatas sa pagamutan nitong Marso 12 dahil sa pneumonia at bumubuti na ang kondisyon nito.

Pinag-quarantine na ang asawa nito na si Meycauayan City Mayor Linabelle Ruth Villarica at ang mga staff ng mambabatas.