Tatay patay, 2 anak sugatan sa karnaper

MANILA, Philippines — Namatay noon din ang isang 40-anyos na ama habang nasugatan ang dalawa nitong anak na babae nang sila ay pagbabarilin ng isang lalaki at tangayin ang kanilang motorsiklo sa Sitio Torres, Brgy. Limbo, Sultan Kudarat.

Ang nasawi dahil sa mga tama ng bala sa iba’t ibang bahagi ng katawan ay kinilalang si Badrudin Salik Mamalangkas habang ang dalawang anak nitong babae na may edad 10 at 7 ay nasugatan at dinala sa ospital.

Sa ulat, alas-7:20 ng gabi ay minamaneho ni Badrudin ang kanyang itim na Honda XR200 (KQ7622) lulan ang dalawang anak at pagsapit sa bahagi ng Sitio Torres ay bigla silang hinarang ng suspek at walang sabi-sabing pinagbabaril.

Nang bumagsak ang mag-aama ay tinangay ng hindi pa kilalang suspek ang motorsiklo at tumakas.