Illegal Chinese workers palalayasin sa Pinas

MANILA, Philippines — Tiniyak kahapon ni Presidential Spokesperson Salvador Panelo na ipade-deport ang lahat ng Chinese workers kapag napatunayan na ilegal ang pananatili nila sa bansa matapos mabunyag ang bayaran sa Bureau of Immigration.

“Basta ‘yung mga iligal pababalikin natin sa pinanggalingan nila. Basta may iligal na ginawa, ang presidente natin palaging (sinasabi) ipatupad ang batas,” sabi ni Panelo.

Magugunita na nauna nang ipinag-utos ni Pangulong Rodrigo Duterte ang pagtanggal sa puwesto sa mga opisyal ng BI na sangkot sa tinatawag na “pastillas” scheme kung saan nakakakolekta ng pera ang mga ito sa mga pumapasok na mga Chinese.

Matatandaan na humarap sa pagdinig sa Senado si immigration officer Allison Chiong na nagsiwalat na hindi na dumadaan sa tamang proseso ang mga Chinese na ang mga pangalan ay nakatimbre na sa BI.