P300 ipapakain ni Duterte sa BI men na sabit sa pastillas
MANILA, Philippines — Pakakainin umano ni Pangulong Rodrigo Duterte ng P300 ang mga tauhan ng Bureau of Immigration na sangkot sa modus na pastillas sa ahensiyang ito.
Ito ang isiniwalat kahapon ni Senador Christopher “Bong” Go bilang babala sa mga opisyal at tauhan ng BI na sangkot sa ‘pastillas’ scheme na rito, ibinabalot sa nakarolyong bond paper na tila pastillas ang P10,000 na ibinabayad sa mga tauhan ng BI para makapasok sa bansa ang mga iligal na Chinese national.
Walang ibang ibinigay na detalye si Go maliban sa pagsasabing noong isang linggo ay may pinakain si Duterte ng perang nagkakahalaga ng P300.
“Maniwala kayo o sa hindi, ipapakain sa inyo yang pastillas na yan pero ang palaman, hindi polboron, ang palaman pera. Noong isang linggo lang may pinakain si Pangulo...P300 nilunok nya,” sabi ni Go.
Nilinaw naman ni Go na hindi opisyal ng gobyerno ang pinakain ng pera kundi isang manloloko at manggamit ng pangalan.
Nagbiro pa si Go na tiyak na mababawasan ang nilunok na P300 kaya magiging barya na ito kapag lumabas.
“Sabi ng Pangulo ‘mahilig ka sa pera ngayon kainin mo ang pera’ di kinain nya nang buo, ang problema yung P300, pagbawas nyan, barya na,” sabi ni Go.
- Latest