Manyak sa bus nalambat
MANILA, Philippines — Nadakip ang isang lalaki makaraang mapagkaisahan siyang arestuhin sa loob ng isang pampasaherong bus matapos na manyakin at hipuan ang isang babaeng pasahero kamakalawa ng gabi sa Pasay City.
Kinilala ang inaresto na si Raymond Sevilla, alyas “Rey”, may-asawa, isang operations manager sa isang pribadong kumpanya at nakatira sa Sabio Street, Makati City. Inireklamo siya ng biktima na itinago sa alyas na “Carmi”, 25, dalaga, isang waitress at nakatira sa San Miguel, Pasig City.
Sa ulat ng Pasay City Police, naganap ang insidente dakong alas-11:30 ng gabi sa loob ng isang DLTB Bus na bumibiyahe sa Northbound ng South Luzon Expressway sa bahagi ng naturang lungsod.
Ayon kay Carmi, natutulog siya nang maramdaman niyang may humihimas sa kaniyang kaliwang hita malapit sa kaniyang kaselanan. Nang maalimpungatan siya, tinanggal ng manyak ang kamay niya hanggang sa bumalik sa pagtulog ang biktima. Dito muling naramdaman niya ang kamay na humihimas sa hita niya kaya tuluyan na siyang nagising at sinampal ang suspek.
Dito sumigaw ang dalaga at sinabing may manyak sa loob ng bus. Nagkaroon na ng komosyon hanggang sa hulihin siya ng ibang pasahero at konduktor ng bus na si Rudy Fernandez.
- Latest