2 lalaki natagpuang patay sa tabi ng SUV
MANILA, Philippines — Natagpuang patay ang dalawang lalaki na may mga tama ng bala sa iba’t ibang bahagi ng katawan sa tabi ng isang nakaparadang sports utility vehicle (SUV) malapit sa Manggahan Floodway sa Brgy. Sta. Lucia, Pasig City kahapon ng madaling araw.
Sa ulat, dakong alas-2:00 ng madaling araw nang madiskubre ang bangkay ng dalawang lalaki na nakahandusay sa tabi ng isang puting Mitsubishi Montero, na walang plaka, at nakaparada sa East Bank Road, Brgy. Sta. Lucia.
Sa salaysay ng mga residente, nakarinig na lamang sila ng mga putok ng baril at ilang sandali ay isang lalaki ang nagtungo sa lugar at dito nadiskubre ang bangkay ng dalawang lalaki kaya’t iniulat niya ito sa himpilan ng pulisya.
Inaalam naman ng mga otoridad kung may kinalaman sa transaksiyon sa ilegal na droga ang krimen matapos na makadiskubre ang dalawang pakete ng shabu mula sa eyeglass case ng isa sa mga biktima, na tinatayang nagkakahalaga ng P100,000.
- Latest
