Ex-judge, misis tupok sa sunog

MANILA, Philippines — Halos hindi na ma­kilala ang bangkay ng isang retiradong hukom at misis nito habang nawawala naman ang kanilang 21-anyos na gulang na apong lalaki matapos makulong sa nasusunog nilang bahay kahapon ng mada­ling araw sa kahabaan ng Zamora St., Brgy. Centro, Mandaue City, Cebu.

Ang nasawing mag-asawa ay kinilalang sina dating Municipal Trial Court (MTC) Judge Gerard Gestopa, 67; at misis nitong si Louella, 66.

Sa ulat, ng Mandaue City Fire Marshal dakong alas-2:00 ng madaling araw nang magsimula ang sunog sa bahay ng isang Edwin Ermac na mabilis na kumalat sa katabing bahay na pag-aari ng retiradong hukom.

Ayon sa imbestigasyon, nagawang ma­kalabas ang mag-asawa sa nasusunog nilang bahay, pero binalikan nila ang kanilang apong si Gerick hanggang sa tuluyan nang makulong ng apoy.

Umabot sa ikaapat na alarma at naapula bandang alas-4:10 ng mada­ling araw na kung saan ay aabot sa 15 kabahayan ang napinsala.

Patuloy namang pi­naghahanap ang apo ng mag-asawa na hindi pa batid kung nakaligtas o kasama ring natupok ng apoy.