‘Big Bang’ posible pa!
Phivolcs:Magma patuloy ang pag-akyat...
MANILA, Philippines — Inihayag kahapon ni Philippine Institute of Volcanology and Seismology (Phivolcs) Renato Solidum na posibleng sumabog muli ang Bulkang Taal dahil sa patuloy na pag-akyat ng magma sa bunganga nito.
“Definitely may papaakyat na magma. May nagsusupply pa doon,” wika ni Solidum sa isang press conference kahapon ng umaga.
Ayon sa Phivolcs, kahit na naobserbahan ang pananahimik ng bulkan sa nakalipas na araw na naglalabas ng steam emission na may taas na 100 hanggang 500 meters ay may kakaiba namang pagkilos ang bulkan sa ilalim.
Ipinaalala ng Phivolcs, na ang mahihinang pagyanig at pag-akyat ng lebel ng sulfur dioxide ay indikasyon nang paggalaw ng magma na posibleng papunta sa muling pagsabog ng bulkan.
Inihayag ni Solidum, na ito ang dahilan kaya patuloy na nakataas ang alert level 4 sa loob ng 14 kilometers permanent danger zone.
Inamin ni Solidum na hindi pa masasabi ng Phivolcs kung hanggang kailan tatagal ang pag-aalburuto ng bulkan.
Samantala sinabi naman ni DILG Assistant Sec. Epimaco Densing na mananatili ang kautusan nilang pagpapasara muna ng lahat ng mga business establishments sa mga lugar na malapit sa Bulkan Taal kasama na ang Tagaytay City.
Kabilang sa partikular na kanilang pinapasara ang Taal Vista sa Tagaytay City na bukod tanging nakabukas na business establishment.
- Latest