17-anyos na obrero dedo sa ginigibang pader

MANILA, Philippines — Hindi na umabot pang buhay sa pagamutan ang isang 17-anyos na cons­truction worker nang mabagsakan ng ginigibang pader sa loob ng isang residential house, sa Binondo, Maynila, kamakalawa ng hapon.

Kinilala ang nasa­wing biktima na si Sherwin Apable, residente ng Acacia Magsaysay St., Tondo, Maynila dahil sa tinamong matinding pinsala sa ulo.

Sa ulat ng Manila Police District-Homicide Section, dakong alas 4:50 ng hapon nitong Biyernes nang maganap ang insidente sa loob ng isang unit sa Ritzville Residence, Muelle de Binondo St., Binondo, Maynila.

Sa imbestigasyon, niyaya ng pinsang si Jide Ordas ang biktima na tumulong sa trabaho ng ama sa ginagawang unit sa Ritzville Residence.

Nanghiram pa umano ng malaking martilyo ang biktima sa ama para gibain ang partition side ng kuwarto nang biglang bumagsak ang isang malaking slab na tumama sa kanyang ulo.

Bumagsak ang biktima na duguan, lumobo ang kaliwang bahagi ng pisngi at nagkaroon ng black eye habang may umaagos na dugo sa ilong at ulo.

Isinugod pa siya sa Justice Jose Abad Santos General Hospital subalit idineklarang dead-on-arrival.