Karambola ng 5 sasakyan: 6 patay
Friday the 13th tragedy
MANILA, Philippines — Anim katao kabilang ang apat na menor de edad ang nasawi sa naganap na karambola ng limang sasakyan sa roundball ng national highway Alunan Avenue, Tacurong City, Sultan Kudarat, kahapon ng madaling araw.
Ang mga nasawi ay kinilalang sina Naimea Kusain; Juhaiber Mamusaka,12; Juhaina Mamusaka, 9; Aipa Mamusaka, 2; Juhairi Mamusaka,1, pawang residente ng Fatima General Santos City at Atong Ontong, 19, grade 12 student ng Southern Mindanao Institute of Technology (SMIT) ng Brgy. Poblacion, President Quirino, Sultan Kudarat.
Ang mga nasugatan ay isinugod sa pagamutan ay kinilalang sina Nasher Mamosaka, 33; driver ng tricycle na sinasakyan ng mga biktima at 10 iba pa.
Sa ulat ni Tacurong City Police Officer-in -Charge Lt. Col. Rey Egos, isang sports utility vehicle, isang pickup truck, dalawang tricycle at isang motorbike ang nagkarambola dakong alas-4:10 ng madaling araw sa kahabaan ng Alunan highway, Purok 9, Brgy. Poblacion ng lungsod na ito.
Lumalabas sa imbestigasyon, humahagibis ang isang Mitsubishi Montero SUV na minamaneho ni Omar Acob at Toyota HiLux pickup truck na minamaneho naman ni Bren Marohombsar nang salpukin nito ang isang kulay itim na Kawasaki CT 100 na minamaneho ni Mamosaka sa nasabing highway.
Sa lakas ng pagkakabangga ay natanggalan ng bubong ang dalawang tricycle kung saan anim katao ang dead on the spot sa insidente habang ang iba pa ay sugatan namang isinugod sa ospital na kung saan ang isa dito ay idineklarang dead on arrival.
- Latest
