2 tinodas sa lamay
MANILA, Philippines — Pinagbabaril ng isang lalaking nakasuot ng face mask ang dalawang lalaki na nakikipaglamay sa isang lamayan sa Caloocan City, kamakalawa ng gabi.
Ang mga nasawi ay kinilalang sina Crisostomo Santiago, 27, ng Malvar Street, Brgy. 142; at Jasper Esliza, 17, ng Gen. Mascardo Street, Brgy. 144. Habang sugatan naman si Joshua Arcega, 27, nang tamaan rin ng bala.
Sa ulat ng pulisya bago naganap ang pamamaril, alas-11:20 ng gabi sa isang burol sa may Balagtas Street sa Brgy. 143, ng naturang lungsod ay nasa kasarapan ng pagsusugal ang mga biktima nang dumating ang nag-iisang salarin na nakasuot ng facemask at walang sabi-sabing pinaputukan ang mga nasa lamesa ng sugalan.
Namatay noon dina sina Santiago at Esliza dahil sa mga tama ng bala sa ulo habang isinugod si Arcega sa Manila Central University Hospital.
Kaswal na naglakad papatakas ang suspek bitbit ang armas na ginamit sa pamamaril.
Pinaniniwalaan ng pulisya na si Santiago ang aktuwal na target ng salarin habang nadamay lamang sina Esliza at Arcega makaraang aminin ng ama ni Santiago na dalawang beses na itong pinagtangkaang paslangin, una ay sa pananaksak at ikalawa ay pamamaril ngunit nakaligtas sa mga ito.
- Latest
