Magpinsan na kagawad dinedo sa highway
MANILA, Philippines — Kapwa nasawi ang magpinsan na barangay kagawad nang sila ay pagbabarilin ng riding in tandem suspects sa kahabaan ng highway ng Sitio Napac-an, Brgy. Kalumboyan, Bayawan City, Negros Oriental kahapon ng umaga.
Ang mga nasawi ay kinilalang sina Felipe Semillano Condez Jr., 60; at Jonesis Juanitez Condez, 31, may-asawa; pawang kagawad sa Brgy. Kalamtukan ng lungsod na ito.
Sa ulat, bago nangyari ang krimen, alas-10:30 ng umaga sa kahabaan ng highway ng Sitio Napac-an, Brgy. Kalumboyan, Bayawan City ay lulan ng motorsiklo ang magpinsan at pauwi na sa kanilang bahay galing sa kalunsuran ng Bayawan.
Sinundan sila ng mga suspek na sakay ng motorsiklo at pagtapat sa mga biktima ay agad na pinagbabaril sa iba’t-ibang bahagi ng katawan.
Kapwa duguang bumagsak mula sa sinasakyan ng mga itong motorsiklo na pawang agad binawian ng buhay sa insidente.
Mabilis namang nagsitakas ang mga suspek patungo sa hindi pa malamang destinasyon.
- Latest