Magpinsang babae kinatay
MANILA, Philippines — Karumal-dumal na kamatayan ang sinapit ng magpinsang babae nang abangan at pagtatagain ng hindi nakilalang suspek habang lulan ng kanilang motorsiklo sa Brgy. San Isidro, Castilla, Sorsogon kamakalawa.
Magkahiwalay na bumulagta sa kalsada ang magpinsang Joana Doctor Gonzales, 34; at Jolina Gonzales Jesalva, 17, saleslady, pawang residente ng nasabing barangay.
Wala namang nakakilala sa suspek na tumakas patungo sa hindi malamang direksyon.
Sa ulat, alas-9:30 ng umaga ay lulan ng kanilang motorsiklo ang magpinsan patungong bayan nang abangan ng suspek na armado ng itak.
Bago pa nakaiwas ang mga biktima ay pinagtataga na sila ng suspek sa iba’t ibang bahagi ng katawan.
Duguang bumagsak sa kalsada si Jolina habang kahit sugatan ay nagawa pa sanang makatakbo ni Joana pero hinabol siya ng suspek at saka pinagtataga hanggang mamatay.
Rumesponde ang mga pulis pero hindi na nila inabutan ang suspek.
- Latest