2 PMA cadets na-ospital sa hazing
MANILA, Philippines — Nakaratay sa ospital ang dalawa pang kadete ng Philippine Military Academy (PMA) matapos na dumanas ng hazing.
Ito ang kinumpirma kahapon ni AFP Spokesman Brig. Gen. Edgard Arevalo na nagpapatuloy na nagpapagaling sa military hospital.
Habang patuloy ang imbestigasyon ay hindi muna pinangalanan ni Arevalo ang pangalan ng dalawang kadete na may ranggong 4th Class.
Ang dalawang kadete ay mga kaklase ng nasawi sa hazing na si Cadet 4th Class Darwin Dormitorio, 20, na binawian ng buhay noong Setyembre 18 ng taong ito.
“Two other fourth class cadets from the pma are now confined at a military hospital, one of them was admitted in 17 September and the other was admitted in 21 September both incidents sadly are suspected to be maltreatment cases (hazing),” pahayag ni Arevalo.
Natukoy na ang mga upperclassmen ng dalawang na-hazing na kadete na kasalukuyang nasa PMA Holding Center habang iniimbestigahan.
Nakakarekober na ang katawan ng nasabing dalawang namaltratong kadete na 24 oras na binabantayan ng PMA Station Hospital na kapwa dumadaing ng matinding pananakit ng tiyan.
Sa kaso ng hazing, sinabi ni Arevalo na anim ang nahaharap sa kasong administratibo, apat ang posibleng mapatalsik sa akademya, isa ang nahaharap sa class 1 offense o ang pinakamataas na kategorya ng kaparusahan na ipinapataw sa mga nagkakasalang kadete.
- Latest