Trak swak sa bangin: 20 patay
Galing sa paliligo sa beach...
MANILA, Philippines — Nauwi sa trahedya ang katatapos na beach outing ng isang magkakamag-anak matapos masawi ang 20 katao habang 9 ang nasugatan nang mahulog sa bangin kahapon ng umaga ang sinasakyan nilang forward truck sa highway ng Brgy. Lambagan, T’boli, South Cotabato.
Ayon sa pulisya, 14 sa mga biktima ay namatay sa lugar ng pinangyarihan habang ang anim ay namatay sa ospital.
Sa ulat, bago nangyari ang aksidente bandang alas-10:35 ng umaga ay sakay ang mga biktima sa forward truck (WNN-207) at pauwi na sa kanilang tahanan sa bayan ng Surralah mula sa night swimming sa isang beach resort sa General Santos City.
Habang binabaybay ang highway ng Brgy.Lamsalome ay nagkaaberya ang makina ng trak at nawalan ng kontrol sa manibela ang driver at diretso itong nahulog sa bangin na kung saan ay paikot-ikot ang trak.
Nahirapan ang rescue team sa retrieval at search operation dahilan masyadong malalim ang bangin na kinahulugan ng nasabing truck. Patuloy ang imbestigasyon ng pulisya sa kaso.
- Latest
