P204-M shabu nasamsam sa Pasig condo
MANILA, Philippines — Aabot sa 30-kilo ng hinihinalang shabu, na may estimated street value na P204 milyon ang nakumpiska ng mga otoridad mula sa isang drug suspect sa isang raid sa inuupahan nitong condo unit sa Brgy. Rosario, Pasig City kamakalawa ng gabi.
Kinilala ang suspek na si Manolito Lugo Carlos, alyas ‘Lito’ at ‘Tonge’.
Sa ulat ng pulisya, alas-7:40 ng gabi nang salakayin ng mga otoridad ang inuupahang unit ng suspek sa C. Raymundo Avenue ng nasabing lugar.
Narekober ng mga otoridad mula sa suspek ang may 30 malalaking plastic packs ng Chinese tea na ang bawat plastic pack ay naglalaman ng isang kilo ng hinihinalang shabu o kabuuang 30 kilos.
Nakakumpiska rin ang mga iba’t ibang drug paraphernalia, bank deposit slips, na may nakalagay na malalaking halaga ng remittances, na sinasabing bayad para sa ilegal na droga.
Lumitaw na ang suspek ay isang high value target at miyembro ng isang drug syndicate na sangkot sa illegal drug trade sa Metro Manila, Region 3 at Calabarzon.
Taong 2000 umano nang unang maaresto ang suspek sa kasong ilegal na droga ngunit pinawalang-sala ng isang hukuman sa Mandaluyong.
Ayon naman kay NCRPO Chief, PMGen. Guillermo Lorenzo Eleazar, konektado si Carlos sa isang napatay na suspek sa isang buy-bust operation sa Quezon City noong Linggo, na sinasabing may kontak na drug lord, na kahit nagsisilbi ng sentensiya sa New Bilibid Prison (NBP) ay tuloy pa rin sa kanyang ilegal na aktibidad.
- Latest