Nakadispalko ng benta ng shabu, itinumba ng kaibigan

MANILA, Philippines — Binalewala lang ng isang 24-anyos na lalaki ang pagiging magkaibigan nila ng biktima nang kanyang pagbabarilin dahil sa hindi pagbabayad ng utang nitong shabu naganap kahapon ng umaga sa Tondo, Maynila.

Ang biktima na idineklarang patay sa Ospital ng Tondo dahil sa mga tama ng bala sa katawan ay kinilalang si Robin Roland Relango, 24, ng no. 1139 B, Vargas St., Barangay 216, Zone 20, Tondo.

Tumakas naman ang suspek na kinilalang si Renielle Punzalan, kababata at kapitbahay ng biktima sa lugar.

Sa ulat, bago nangyari ang pamamaril alas- 10:00 ng umaga sa loob ng bahay ng suspek ay nakita nito ang biktima na isang taong nagtago dahil sa nadispalko nito ang pera mula sa iligal na droga kaya’t ito ay niyaya sa bahay.

Pagdating sa bahay ay walang kaabog-abog na pinagbabaril ng suspek ang nabiglang biktima nang sabihin na hindi nito mababayaran ang nadispalkong pera.

Nagawa pang makalabas ng biktima sa bahay at nakapagsumbong pa sa ama na siya ay binaril ng suspek.

Isinugod pa ng ama sa nasabing ospital ang biktima,subalit nabigo nang maisalba ang buhay.