Karnaper todas sa biniktimang parak
MANILA, Philippines — Mistulang nagkamaling biktimahin ng dalawang lalaking karnaper ang isang pulis na puwersahang kunin ang dala nitong motorsiklo matapos na mabaril at mapatay ang isa habang nadakip ang kasama naganap kahapon ng madaling araw sa Las Piñas City.
Inaalam pa ang pagkakakilanlan ng napatay na suspek habang isinasailalim sa imbestigasyon ang naarestong kasama na hindi muna pinangalanan ng pulisya.
Sa ulat, dakong ala-1:30 ng madaling araw ay minamaneho ni P/Cpl Eric Jones Ambat, nakatalaga sa naturang lungsod, ang kanyang motorsiklo nang harangin siya ng dalawang suspek na magkaangkas sa motorsiklo sa may Tionquiao St., Brgy. Manuyo Dos.
Tinutukan ang pulis na noon ay nakasibilyan at sapilitang pinaalis sa kanyang motorsiklo.
Kusang-loob namang ibinigay ng pulis ang kanyang motor ngunit nang nakasakay na ang isa sa suspek ay dito na siya nagbunot ng kanyang baril at saka nagpakilalang pulis.
Sa halip na sumuko ay nagtangka umanong paputukan siya ng isa sa mga suspek kaya’t inunahan na nitong barilin habang sumuko ang isang suspek na nahaharap sa kasong attempted carnapping at illegal possession of firearms.
- Latest
