Ex-chairman timbog sa shabu

MANILA, Philippines — Natimbog ng mga otoridad ang isang dating barangay chairman sa Pasay City sa isang anti-drug operation, kamakalawa ng gabi sa nasabing lungsod. 

Kinilala ang suspek na si Carlos Tolentino Jr., alyas Kap Charlie, 67, da­ting kapitan ng Brgy. 104 at kabilang sa drug watchlist ng pulisya.

Sa ulat ng Southern Police District Office, alas-9:50 kamakalawa ng gabi nang madakip ng mga elemento ng Pasay City Police-Station Drug Enforcement Unit si Tolentino Jr., nang kumagat sa pain ng mga pulis makaraang bentahan ng isang maliit na plastic sachet ang isang nagpanggap na buyer.

Nadakip din ang ­kasabwat ni Tolentino na si Estrella Casque at nakumpisa ang maliit na plastic sachet ng shabu sa kanila.