‘Pamangkin’ ni De Lima arestado sa drug case
MANILA, Philippines — Sa loob ng dalawang taong pagtatago sa batas ay naaresto na ng NBI ang isang lalaki na sinasabing ‘pamangkin’ at kapwa akusado ni detained Senator Leila De Lima matapos matunton ang pinagtataguan nito sa Balibago, Angeles City, Pampanga, kahapon ng umaga.
Ang suspek ay kinilalang si Jose Adrian Tiamson Dera, alyas “Jad De Vera”, na dinakip sa kaniyang bahay sa Diamond Subdivision, Balibago, Angeles City.
Ayon kay NBI Assistant Director for Intelligence Eric Distor, isang buwan ang ginawang pagmamanman ng NBI-STF sa mga lugar na posibleng puntahan ni Dera hanggang sa matunton siya sa Diamond Subdivision.
Si Dera ay may nakabinbing kaso sa Muntinlupa Regional Trial Court Branch 205 na nag-isyu ng warrant of arrest noong Hulyo 19, 2017 laban sa kaniya at kay De Lima sa paglabag sa Section 5, Section 3, Section 26, Section 28 ng Republic Act 0165 o Comprehensive Dangerous Drugs Act of 2002.
Kaugnay ito sa illegal drug trading na sangkot ang mismong Bureau of Corrections (BuCor) at kasamang mga akusado sina Ronnie Dayan, ang dating bodyguard-lover ni De Lima; ang dating aide na si Joenel Sanchez; at ang dating director general ng BuCor na si Franklin Bucayu, dating aide na si Wilfredo Elli at ang convicted drug lord na si Jaybee Sebastian.
Mananatili sa NBI detention facility si Dera hanggat hindi pa nakukuha ang commitment order mula sa korteng nabanggit.
- Latest
