Bigti gamit ang lubid gustong death penalty ni Duterte
Para mas tipid…
MANILA, Philippines — Pagbigti gamit ang lubid ang pamamaraan ng parusang ipapataw sa drug-related cases at plunder ang nais ng Malacañang upang mas tipid sakaling maibalik na ang death penalty sa bansa.
Sinabi ni Sec. Panelo, dahil mismong si Pangulong Rodrigo Duterte ang nagbanggit nito sa kanyang ika-apat na State of the Nation Address (SONA) ay sesertipikahang urgent ng chief executive ang panukalang ibalik ang death penalty.
“Siguro mas gusto niya (Duterte) yung death penalty hoping it will mitigate the upsurge of the drug menace and plunderous activities. Kung tatanungin mo siya, walang gastos ‘yung lubid. Pero siguro ‘yung dati natin, lethal injection,” paliwanag pa ni Panelo sa media briefing sa Malacañang.
Naghain naman na ng panukalang batas si Sen. Bong Go ng Senate Bill 207 na nagsusulong na ibalik ang death penalty sa illegal drug cases.
Sa ilalim ng panukala ni Sen. Bong Go, nais nitong buhayin ang parusang bitay sa pamamagitan ng lethal injection.
“Sana po tulungan kami. Part ito ng continuing campaign ni Pangulong Duterte…Mahabang usapan ito. Ito na ang panahon, wala pong naglakas loob noon,” wika ni Sen. Go.
- Latest
