Guro nasawi sa Brigada Eskwela
MANILA, Philippines — Dahil umano sa sobrang kapaguran sa paglilinis ng silid-aralan bilang bahagi ng Brigada Eskwela ng Department of Education (DepEd) ay nasawi ang isang guro matapos maputukan ng ugat sa kanyang ulo.
Kaya umaapela ng tulong ang pamilya ni Minerva Rusia Aberia, 59, grade 6 English teacher ng P. Paez Elementary School sa Tondo Maynila.
Nabatid na bago nasawi si Minerva nitong Hunyo 13, 2019 ay naratay muna ito ng mahigit tatlong linggo sa ospital kayat umaabot na sa kalahating milyon ang nagagastos ng pamilya at may natitira pang hospital bill na umaabot naman sa P400,000.
Kasalukuyan pang naka-burol sa Sta. Cruz Chapel sa Pinoy St., Balut Tondo Maynila si Minerva at wala pang nakatakdang araw ang libing.
Isang mahusay, mabait, matulungin at masipag na guro si Minerva at kahit anong trabaho ang ibigay sa kanya ay wala itong reklamo sa halip ay ginagampanan nito ng buong husay na may pagmamahal sa paaralan at kanyang mga estudyante.
Mahigit sa tatlong dekada ng nagtuturo sa public school si Minerva at sa pagtatapos sana ng school year 2019-2020 ay magreretiro na ito.
Umaasa ang pamilya ni Minerva na tutulungan sila ng Deped na unang nangako sa kanila.
- Latest