Indonesian tiklo sa P9-M cocaine

MANILA, Philippines — Swak sa selda ang isang Indonesian matapos mabuking ng mga otoridad ang dala nitong nasa 1.6-kilo ng pinaghihinalaang ‘cocaine’ na nakatago sa kanyang luggage makaraang dumating sa terminal 3 ng Ninoy Aquino International Airport, kahapon.

Himas-rehas na ngayon ang suspek na nakumpisakahan ng droga na may halagang nasa P9-milyon na si Agus Burhan, 62 taong gulang.

Si Burhan ay sakay ng Qatar Airways flight QR 932 na lumapag sa NAIA Terminal 3.

Nabatid na nakatago ang nasabing droga sa isang secret compartment ng bagahe ng suspek.

Samantala, itinanggi ni Burhan na sa kanya ang drogang nakum­piska, gayunman makiki­pag-tulungan umano ito para maituro at mahuli ang nagbigay sa kanya ng cocaine.

Nakatakda namang sampahan ng kaukulang kaso ang nasabing dayuhan.