Trike vs kotse: 3 todas, 3 sugatan
MANILA, Philippines — Namatay ang tatlong katao habang tatlo ang nasugatan matapos na sumalpok ang kanilang sinasakyang tricycle sa isang Toyota Sedan at sumalpok uli sa isang Nissan pick-up, kamakalawa ng hapon sa national highway ng Kakai Renabor, Tubod, Lanao del Norte.
Ang mga nasawi ay kinilalang sina Samia Pasan Montila, 30; Charlyn Mondido Sumagang, 33; kapwa taga-Barangay Libertad; at Amenola Hadji Latip, ng Barangay Manga ng bayan ng Ko-lambugan.
Nasugatan naman sina KJenelyn Filipino Sayre, 31; Mohammad Jalil Pa-san Montila, 9; at Antonina Pang-an Balatero, 55.
Sa ulat, alas-3:30 ng hapon ay bumabagtas ang tricycle na sinasakyan ng mga biktima sa nasabing highway nang salpukin ng Toyota Sedan na patungo sa bayan ng Ko-lambugan.
Nawalan ng kontrol ang driver ng tricycle kaya’t nasalpok din ito ng paparating na Nissan pick-up dahilan para tumilapon ang mga biktima.
Tumakas ang driver ng Toyota Sedan at sumakay sa isang puting Toyota Revo.
Nang isailalim sa beripikasyon ang plaka ng Sedan na AA-1884 ay nakarehistro ito sa isang Nicanor Andal Garcia ng Fairview, Quezon City at hinala na tinangay ito ng mga suspek.
Sumuko naman ang driver ng Nissan pick-up (FOZ-853) na si Prince Alexander Umpa Caorong sa pulisya.
- Latest