55 katao nasawi sa summer vacation
MANILA, Philippines — Umabot na sa 55 katao ang nasawi na karamihan ay pagkalunod ngayong buwan ng summer vacation (Sumvac).
Ito ang inihayag ni Philippine National Police (PNP) Chief P/Director General Oscar Albayalde na lubhang anyang nakakaalarma ang pagtaas ng bilang ng mga nasawi lalo na sa pagkalunod.
Sa 55 kataong nasawi, ang 45 sa pagkalunod, 8 sa vehicular accident, isa sa pamamaril at isa naman ang nakuryente na naitala simula Abril 5-21 ng taong ito.
Kabilang naman sa mga pinakahuli sa mga naitalang nasawi ay ang pagkalunod ng isang 16 anyos na estudyante na si Jhun Marvin Hizola, sa Matangkob River, Brgy. Poblacion, Magsaysay Occidental Mindoro kamakalawa dakong ala-1:40 ng hapon.
Patuloy naman ang paalala ng PNP sa mamamayan na isagawa ang kaukulang pag-iingat at manatiling vigilante ngayong panahon ng bakasyon upang makaiwas sa kapahamakan.
- Latest
