33 kababaihan na ibinubugaw sa Boracay, nasagip
MANILA, Philippines — Umaabot sa tatlum-pu’t tatlong kababaihan na ibinubugaw partikular na sa mga dayuhang turista sa Boracay Island, Malay, Aklan ang nasagip sa isinagawang serye ng operasyon kamakalawa.
Anim na bugaw ang naaresto na kinilalang sina Richard Sauza, 42; Kevin Martin , 26; Mark Vincent Faulan, 23; Fernando Fajardo,42;Rebecca Caingle, 56 at Karen Belonio; pawang residente ng Brgy. Manoc-Manoc, Boracay Island, Malay ng lalawigan.
Sa imbestigasyon na ang nasabing mga kababaihan na ginagawang prostitutes ay nasagip sa serye ng operasyon ng mga operatiba ng Malay Police Station (MPS) sa pamumuno ni Captain Jose Mark Anthony Gesulga; 2nd Aklan Police Mobile Force Company (PMFC) sa pamumuno ni Police Col . Ryan Manongdo at Aklan Port –Base Anti-Human Trafficking Unit.
Nabatid na nakatanggap ng ulat ang pulisya hinggil sa exploitation sa mga biktima bilang mga prostitute sa dalawang inuupahang establisyemento at dating KTV Bar na matatagpuan sa Brgy. Manoc-Manoc, Malay ng lalawigan.
Isinailalim na sa kustodya ng Municipal Social Welfare Development Office (MSDO) sa Malay Aklan ang mga biktima habang ang mga nasakoteng bugaw ay nakakulong na.
- Latest