Aide ni ex-Mayor Junjun Binay, binaril
MANILA, Philippines — Malubhang nasuga-tan ang executive secretary ni dating Makati City Mayor Junjun Binay nang ito ay barilin ng isang lalaki na nakamotorsiklo sa harapan ng bahay nito kamakalawa ng gabi sa Brgy. Olympia, Makati City.
Kasalukuyang nasa Makati Medical Center ang biktimang si Monaliza “Monette” Bernardo, 44 na tinamaan ng bala ng kalibre 45 sa sikmura.
Batay sa ulat, dakong alas-8:50 ng gabi ay papasok pa lang sa kanyang bahay ang biktima mula sa campaign meeting nang sumulpot ang suspek na lulan ng motorsiklo na walang plaka at agad na pinagbabaril ang biktima.
Agad na tumakas ang hindi pa kilalang suspek na nakasuot ng helmet patungong South Avenue at lumiko pakaliwa ng Barasoain St.
Inihayag kahapon ni dating Vice President Jejomar Binay na handa siyang magbigay ng P1 milyon reward sa sinumang makapagbibigay ng impormasyon para sa ikadarakip ng gunman.
Si Binay ay tumatakbong Representative ng first district of Makati. Ang kanyang mga anak na sina Junjun at incumbent Mayor Abigail Binay, ay naglalaban sa pagka-alkalde ng lungsod, na kung saan 1986 pa namumuno ang pamilya.
- Latest
