Sunog sa Pateros: Paslit patay, 2 sugatan

MANILA, Philippines — Isang batang paslit namatay sa sunog habang dalawa pa ang malubhang nasugatan sa naganap na sunog kamakalawa sa bayan ng Pateros.

Patuloy pang inaalam ang pagkakakilanlan ng bangkay ng batang narekober ng mga bumbero habang inisyal na nakilala ang mga sugatan na sina Mike Angelo Poncio, 23 at ang lolong si Alfredo Maglolo, 73.

Sa ulat, alas-11:45 ng Sabado ng tanghali nang sumiklab ang apoy buhat sa isang bahay sa No. 82 M. Lozada Street, Brgy. Sto. Niño-Kanluran, Pateros.

Kumalat ang apoy sa mga kabahayan at nasa 30 bahay ang natupok.

Dakong ala-1:10 ng tanghali nang ideklaranh under control na ang sunog at nang isagawa ang mopping operation ay dito tumambad ang natus­tang bangkay ng isang bata.