NCRPO chief: Walang grupong nandudukot ng mga bata sa Maynila
MANILA, Philippines — “Walang grupo na nangunguha ng mga bata sa Metro Manila”.
Ito ang iginiit ni National Capital Region Police Office (NCRPO) chief Police Major General Guillermo Eleazar na, taliwas sa kumakalat sa social media.
Nanawagan si Eleazar na huwag nang magpakalat ng mga balita na may grupong nandudukot ng mga bata dahil wala umano itong katotohanan at nagdudulot lamang ng takot.
“Walang katotohanan na may nangunguha ng bata. Tayo ay nanawagan sa mga magulang na huwag po kayong mag-panic o maalarma,” ani Eleazar.
Naaresto noong nakaraang buwan sa Parañaque si alyas “Beth” dahil sa tangkang pagdukot sa bata sa BF Homes at sinabi nitong kabilang siya sa isang grupong nangunguha ng mga bata sa ilang lugar sa Metro Manila, Bulacan at Laguna. Pero makalipas ang ilang linggo nag-iba ang pahayag ni “Beth.”
Nahuli rin sa Parañaque noong Huwebes si alyas “Ces” dahil din sa tangkang pagdukot sa bata.
Isasalang sa psychiatric evaluation sina “Beth” at “Ces” dahil sa pabago-bago nilang mga pahayag.
- Latest