Kagawad itinumba ng tandem
MANILA, Philippines — Idineklarang dead on arrival sa ospital ang isang 48-anyos na barangay kagawad nang pagbabarilin ito ng isang lalaki kamakalawa sa Severino Reyes St., Sta. Cruz, Maynila.
Ang nasawi ay kinilalang si Alfredo Ortega Hicana, alyas “Gerry Bok”, kagawad ng Brgy. 356, Zone 36, District 3 at residente ng no. 2318 Severino Reyes St, Sta. Cruz, Maynila.
Batay sa ulat, bago nangyari ang krimen dakong alas-2:07 ng hapon sa 1st Alley ng S. Reyes St., ay nakaupo ang biktima sa entrance gate nang sumulpot ang gunman at walang kaabog-abog na pagbabarilin sa ulo.
Nang bumagsak ang biktima ay sumakay ang gunman sa isang motorsiklo ng naghihintay at mabilis na tumakas patungo sa Laguna St., palabas ng Jose Abad Santos St.
Nakunan ng CCTV ang gunman na nakasuot ng kulay puti na t-shirt, dark colored shortpants, may beltbag at walang suot na sumbrero o helmet at may kaputian ang mukha, maikli o clean cut ang buhok.
- Latest