Mister nalitson sa sunog

MANILA, Philippines — Nalitson nang buhay ang isang 62-anyos na lalaki matapos na hindi makalabas sa nasusunog niyang bahay sa Barangay Barangka, Mandaluyong City, kahapon ng madaling araw.

Kinilala ang biktima na si Raymundo Liwanag Jr., 62, ahente ng funeral homes, residente ng Ayala Homes Subdivision, Ilang-ilang Street, Barangay Drive, Mandaluyong City.

Batay sa ulat ng Mandaluyong Bureau of Fire Protection (BFP), dakong ala-1:10 ng madaling araw nang sumiklab ang sunog sa bahay mismo ng biktima na mga sandaling iyon ay mahimbing na natutulog.

Lumabas sa imbestigasyon na nakakandado ang pintuan mula sa loob ng bahay kaya’t ito ang dahilan kaya hindi nakalabas ang biktima.

Nagkataon na umuwi ng lalawigan ang misis ng biktima.

Ang sunog na bangkay ng biktima ay natagpuan malapit sa poste ng unang palapag ng kanyang tahanan.

Inabot lamang sa unang alarma ang sunog bago naideklarang fireout at inaalam pa ang dahilan ng sunog.