Pagiging SSS member sa mga OFWs, mandatory na
MANILA, Philippines — Isa nang ganap na batas ang Social Security Act of 2018 o SSS Rationalization Act na naglalayong palawakin ang kapangyarihan ng SSS.
Sa bagong batas na nilagdaan ni Pangulong Rodrigo Duterte, magiging mandatory ang membership ng lahat ng mga overseas Filipino workers.
Inaasahang tataas ang bilang ng mga OFWs na miyembro ng SSS mula 500,000 sa 2.5 milyong manggagawa.
Sakop nito ang land-based at sea-based overseas Filipino workers.
Magkakaroon din ng kapangyarihan ang SSS Commission na magdesisyon tungkol sa buwanang kontribusyon ng mga miyembro kung saan papayagan ang pagtaas pagkatapos ng isang “actuarial survey.”
Bukod sa nasabing batas, nilagdaan na rin ng Pangulo ang New Central Bank Act na naglalayon namang palakasin ang regulatory powers ng Bangko Sentral ng Pilipinas.
Magkakaroon ng kapangyarihan ang BSP na parusahan ang mga naglilipat ng malaking shares ng bangko at iba pang financial institutions ng walang pahintulot ng BSP.
Dinagdagan din ang mga financials institutions na masasakop ng BSP.
- Latest