150 pamilya sa Quezon City, nasunugan ng bahay

MANILA, Philippines — Nasa 150 pamilya ang nawalan ng bahay habang 2 katao ang nasugatan sa naganap na sunog kahapon ng hapon sa Quezon City.

Ang dalawang nasugatan ay kinilalang sina Areen Martinez, na nagtamo ng 3rd degree burn sa katawan at Armando Delos Reyes na nasugatan naman sa tuhod.

Sa ulat ni Quezon City Fire Marshal Jaime Ramirez, nagsimula ang sunog dakong ala-1:00 ng hapon sa Brgy. Holy Spirit, Quezon City.

Naging mabilis anya ang pagkalat ng apoy dahil gawa lamang sa kahoy ang mga bahay at umabot sa ikatlong alarma ang sunog bago naapula dakong alas-2:30 ng hapon.

Nasa 45 bahay ang naabo sa sunog na may kabuuang 150 pamilya at patuloy ang imbestigasyon paano nagsimula ang sunog.