PNP walang planong buhayin ang Alsa Masa

MANILA, Philippines — Nilinaw ng pamunuan ng Philippine National Police (PNP) na wala silang plano na muling buhayin ang Alsa Masa o ang grupo ng mga sibilyang tipster ng mga otoridad noong dekada 80 na naging vigilante group.

Ayon kay PNP Spokesman P/Chief Supt. Benigno Durana Jr., na-misinterpret ang inianunsyo ni CALABARZON (Cavite, Laguna, Batangas, Rizal at Quezon) Police Director P/Chief Supt. Edward Carranza  sa sinabing ikinokonsidera ng PNP ang pagpapalawak ng Community Mobilization Project (CMP) bilang intelligence–gathering network  na kahalintulad ng “Alsa Masa”.

Binigyang diin ni Durana na ang nais sabihin ni Carranza ay ipinanukala ng Regional Advisory Council ang pagpapalakas pa ng CMP upang mapagkaisa ang mga stakehol­ders, komunidad, simbahan, aka­demya, business groups at iba pa upang magsagawa ng pagpupulong sa mga pampublikong isyu at seguridad.

Ayon pa kay Durana kailangan ng consultative mechanism para mapaigting pa ang suporta at ta­lento sa pagresolba sa mga problema.