9 bihag ng NPA nasagip
MANILA, Philippines — Siyam katao na bihag ng mga rebeldeng New People’s Army (NPA) ang nasagip ng tropa ng militar matapos na gawin silang “human shield” habang isang rebelde ang napaslang sa bakbakan sa Brgy. Igcabugao, Igbaras, Iloilo kamakalawa ng tanghali.
Ayon kay 1st Lt. Hazel Joy Durotan, Civil Military Operation Officer ng Army’s 61st Infantry Battalion (IB), dakong alas-11:20 ng tanghali nang makasagupa ng tropa ng Army’s 61st Infantry Battalion (IB) ang grupo ng mga rebeldeng NPA sa nasabing lugar .
Nagresponde ang mga sundalo sa lugar matapos na makatanggap ng report na nanghaharass at nangongotong sa mga residente ang tinatayang mahigit sa sampung mga armadong rebelde. Papalapit pa lamang ang mga sundalo ay sinalubong na ang mga ito ng bala ng mga rebelde na nauwi sa bakbakan ng magkabilang panig. Sa kasagsagan ng bakbakan ay pinasok ng mga rebelde ang kubo ng mga residente at hinostage ang siyam katao. Tumagal ng may 30 minuto na ikinasawi ng isang rebelde na inabandona ng mga papatakas nitong kasamahan.
Iniwan ng mga rebelde ang kanilang siyam na bihag bago tuluyang tumakas.
Narekober sa encounter site ang isang backpack, Improvised Explosive Device , bandolier ng 5.56 MM, tatlong galon ng gasolina na gamit ng CPP-NPA sa plano ng mga itong sunugin ang pasilidad ng Century Peak Energy Corporation (CPEC).
- Latest