Karo sumalpok sa trak, ulo ng bangkay sa kabaong lumusot sa windshield
MANILA, Philippines — Mistulang naging doble ang naging kamatayan ng isang patay matapos na sumalpok ang karong sinasakyan sa isang dump truck at lumusot ang ulo matatag nito sa windshield kahapon ng madaling araw sa Quezon City.
Nasugatan sa insidente ang driver ng karo na si Philip Mendoza Warat, gayundin ang kaniyang kasamahan na si Anthony De Guzman habang nagmistula namang “double dead” ang hindi na pinangalanang bangkay nang tumilapon mula sa kinalalagyang kabaong at lumusot ang ulo sa windshield ng karo.
Sa ulat ng Quezon City Police District (QCPD)-Traffic Sector 1, bago naganap ang insidente dakong alas-12:05 ng madaling araw sa kanto ng Quezon Ave. at Roosevelt Avenue ay patungo ang karo ng Saint Peter Funeral para iburol ang bangkay nang bumangga ito sa 12-wheeler dump truck na minamaneho ni Rodolfo Ignacio, na noon ay nag U-turn naman sa lugar.
Sa lakas ng impact ay tumilapon ang bangkay na nasa kabaong at lumusot ang ulo sa nabasag na windshield ng karo habang nasugatan naman sina Warat at De Guzman.
Hindi naman kaagad nahugot ng rescue team ang ulo ng patay mula sa nabasag na windshield dahil sa pangambang maputol ito.
- Latest
