GenSan bomber todas sa engkuwentro
MANILA, Philippines — Napatay ng mga otoridad ang isa sa pangunahing suspek sa pambobomba sa General Santos City sa naganap na engkuwentro sa Brgy. Tambler, kahapon ng umaga.
Ang napatay na terorista ay kinilalang si Basser Sahak, miyembro ng Islamic State of Iraq and Syria (ISIS) inspired group na Ansar al-Khilafa Philippines (AKP) at residente ng Brgy. Daliao, Maasim, Sarangani habang nakatakas ang ama nito na si Kupang Sahak.
Sa ulat, dakong alas-5:45 ng umaga nang makasagupa ng pinagsanib na elemento ng pulisya at militar ang mga miyembro ng AKP terrorists na nakabase sa Sarangani sa Brgy Tambler ng lungsod.
Nabatid na papalapit pa lamang sa lugar ang arresting team nang sila ay pagbabarilin ng AKP–ISIS inspired terrorists na nagresulta sa mainitang bakbakan at napatay si Sahak at nakatakas ang ama nito na si Kupang Sahak.
Si Basser ang isa sa mga teroristang kinasuhan ng multiple frustrated murder sa pambobomba sa Bonita Lying Inn sa Purok Malipayon, Brgy. Apopong, national highway, General Santos City na ikinasugat ng walong indibidwal noong Setyembre 16 ng taong ito.
Bukod dito si Basser din ang lider ng AKP Special Operations Group (SOG) na namumuno sa liquidation operation at extortion.
- Latest