Bantayan ang mga menor na anak sa paggamit ng internet-Joy Belmonte
MANILA, Philippines — Hiniling ni Quezon City Vice Mayor Joy Belmonte sa mga magulang na mapagmasid at bantayan ang kanilang mga menor de edad na anak sa paggamit ng internet.
Ito ang naging pakiusap ni Belmonte sa mga magulang na benepisaryo ng Pantawid Pamilyang Pilipino Program (4Ps) dahil sa maaaring paggamit ng internet sa pagbabahagi ng mga kalaswaan sa hanay ng mga menor de edad.
Anya, isa sa dahilan ng pagtaas ng kaso ng child pornography sa QC ay ang kakulangan sa kaalaman ng mga magulang tungkol sa epekto ng pornograpriya sa mga bata sa paggamit ng internet.
“Kailangan nating alalahanin na, kahit na hindi ginagalaw ang mga bata, hindi pa rin karapat-dapat ang kilos na ipinapagawa ng mga pedophile sa mga batang ito. Akala ng mga magulang na wala itong epekto sa mga bata, pero ito ay malaking bagay na nagdudulot ng trauma sa kabataan,”dagdag ni Belmonte.
Sinabi nito na ilang mga internet cafe at call center sa QC ang nahuli na sa aktong gumagamit ng mga bata sa mga krimeng may kinalaman sa cybersex.
Una nang pinangunahan ni Belmonte ang pagpasa ng Ordinance No. 2163 noong 2012 na naghihigpit sa operasyon ng mga internet cafe o computer rental at gaming shops ang pagbigay ng access sa mga iligal at pornographic websites at pagsumbong sa mga otoridad ng mga posibleng iligal na gawain sa loob ng kanilang establisimiento.
- Latest