Hitman ni Kerwin, lover itinumba
MANILA, Philippines — Pinasok ng anim na nakamaskarang lalaki ang isang beach house at dito ay pinagbabaril ang umano’y hitman ng drug lord ng Eastern Visayas na si Rolando “Kerwin “ Espinosa Jr. at live-in partner nito, kamakalawa sa Brgy. Cambalading, Albuera, Leyte.
Ang mag-lover na namatay noon din ay kinilalang sina Jesus Tulin at Sunshine Paton-og; pawang nasa hustong gulang.
Ang mag-live in partner ay pawang residente ng Ormoc City at nagsisilbing caretaker sa resthouse ng mga Espinosa sa lugar.
Ang bangkay ni Sunshine ay natagpuan sa ground floor habang si Tulin ay nakasalampak naman sa ikalawang palapag ng nasabing resthouse.
Sa ulat, bago nangyari ang pamamaril sa mag-live in dakong alas-3:20 ng hapon ay nasa resthouse ang mga ito nang dumating ang mga armadong salarin.
Sa teorya, unang binaril ng mga suspek si Paton-og na nasa ground floor saka umakyat sa 2nd floor kung saan kasalukuyang nagpipintura si Tulin sa kisame na isinunod rin ng mga itong pagbabarilin.
Matapos na makatiyak na napuruhan ang target ay nagsitakas ang mga salarin patungo sa hindi pa malamang destinasyon. Narekober sa crime scene ang isang cal. 45 pistol at 16 basyo ng nasabing armas.
Si Kerwin ay self confessed drug lord ng Eastern Visayas na ang ama na si dating Albuera Mayor Rolando Espinosa na nasa narcolist ni Pangulong Rodrigo Duterte ay napatay sa raid sa Baybay City Sub Provincial Jail noong Nobyembre 2016.
- Latest