Lanao board member, misis timbog sa P3-M shabu
MANILA, Philippines — Naaresto ng mga otoridad ang isang Lanao del Sur board member, misis nito at konsehal ng Marawi City sa isang anti-illegal drugs operations kahapon ng umaga sa Barangay Tubod, Iligan City, Lanao Del Norte.
Ang mga suspek ay kinilalang sina Lanao del Sur Board Member Hussein Magandia, misis na si Norhainah at Marawi City Councilor Amienquallied Dimal.
Batay sa ulat, dakong alas-5:30 ng umaga nang salakayin ng Philippine Drug Enforcement Agency (PDEA) ang bahay ng mag-asawang Magandia sa nasabing lugar sa bisa ng search warrant.
Sa paghahalughog ng bahay ay nadiskubre ang kalahating kilo ng shabu na nagkakahalaga ng P3.4 milyon at isang baril.
Nabatid na ang mag-asawang Magandia ay miyembro ng Iwaram Drug Group na nagpapakalat ng shabu sa Marawi City, Lanao del Sur at Lanao del Norte.
Samantala, nasakote rin ng mga otoridad ang Sangguniang Kabataan (SK) Chairman na si Regie Abanto at kasama na si Renan Soto sa isinagawang anti-drug operation sa Brgy Gaas, Balamban, Cebu City kamakalawa ng alas-11:00 ng gabi.
Hindi na nakapalag ang mga suspek matapos na arestuhin ng mga otoridad nang maaktuhang nagtutulak ng shabu.
Nakumpiska mula sa mga suspek ang 12 gramo ng shabu na nagkakahalaga ng P 141,600 at mga drug paraphernalia.
- Latest